Zbulohet statuja kolosale e zotit të diturisë në Egjipt!

Nga Lorena Stroka

Një statujë kolosale e zotit të lashtë egjiptian të diturisë, Thoth, është gjetja më e fundit që doli në dritë, në Luxor, gjatë gërmimeve arkeologjike në tempullin e Amenhotepit III. Statuja e Thoth-it është e punuar me granit të kuq dhe ka një lartësi prej 3.5 m.

Arkeologu Zahi Hawass, sekretar i përgjithshëm i këshillit të lartë të antikave në Egjipt, mendon se në bazë të elementeve të gërmimit do të zbulohen edhe statuja të tjera kolosale në zonë.  Midis gjetjeve arkeologjike bëjnë pjesë:  kreu (koka) 2.5 m e Amenhotepit III,  një statujë e Thoth-it, dy statuja të Amenhotepit III të derdhura në granit të zi, gjithashtu dhe një statujë tjetër rreth 5 m e gjatë, e cila ngjan me atë të Thoth-it që sapo u zbulua.

© Albstroka.com