Sa orë duhet të flemë?

Nga Lorena Stroka

Më shumë se shtatë orë duhet të flenë të gjithë ata që dëshirojnë të minimizojnë rrezikun e shfaqjes së sëmundjeve kardiovaskulare, sipas një hulumtimi shkencor të realizuar në SHBA. Sa për ata, që nuk i plotësojnë shtatë orë gjumë, shkencëtarët kanë një zgjidhje perfekte: Dhjetë orë gjumë në fundjavë për të plotësuar gjumin e humbur.

Sipas  studimit, ata që flenë më pak se pesë orë në ditë – përfshirë dhe fjetjen gjatë drekës, rrezikojnë dy herë më shumë që të vuajnë nga angjina, sëmundjet koronare, infarktet ose goditjet në tru.

Gjithashtu, shkencëtarët paralajmërojnë se: personat që flenë më shumë se nëntë orë në ditë, rrezikojnë një herë e gjysmë më shumë që të bien viktima të infarkteve.

Sipas shkencëtarëve në qoftë se njeriu brenda fundjavës nuk arrin të plotësojë 10 orë gjumë, duhet që javën e ardhshme të fle patjetër dy orë më shumë.

Hulumtimi u krye nga shkencëtarët e Departamentit të Mjekësisë të Universitetit të Virxhinias, nën udhëheqjen e pedagogut të mjekësisë Anup Sankar dhe u botua në revistën Sleep.

© Ndalohet ribotimi i shkrimit pa autorizimin e autores.