MOS U DORËZONI SE GJITHMONË KA NJË ZGJIDHJE PËR GJITHÇKA!

Nga Lorena Stroka

Pothuajse të gjithëve na ka ndodhur që pas një humbjeje apo dështimi të madh të zhytemi në vetmi. Të mënjanohemi nga gjithkush duke ndërprerë çdo marrëdhënie shoqërore, pa dhënë asnjë lloj shpjegimi, të ndërrojmë akoma dhe shtet. Kush e di ndoshta asnjëri prej tyre nuk  e kuptoi kurrë arsyen e vërtetë të largimit tonë, pse jo mund të na kenë quajtur akoma dhe të marrë, por ç’rëndësi ka më tani?!… Ka njerëz që nuk janë shumë të fortë shpirtërisht, dhe nuk ndihen të gatshëm të flasin me të tjerët për ato që i shqetësojnë. As nuk duan që problemet e tyre të shndërrohen në objekt diskutimi nga të tjerët orëve të pasdites tek shoqërojnë kafenë me ndonjë biskotë. Mirëpo sa pozitiv mund të jetë një qëndrim i tillë? A e keni menduar ndonjëherë se ç’pasoja mund të sjellë në shëndetin tuaj psikologjik?

Përveç vdekjes, gjithçka është e rikthyeshme, e mundur, për aq kohë sa marrim frymë, ka shpresë, dhe këtë nuk duhet ta harrojmë kurrë. Megjithatë, kjo nuk do të thotë se do të ishte e dobishme të hapnim zemrën tonë kudo, fundja askujt nuk i dhimbset jeta apo problemi jonë. Pak do të kuptojnë, shumë do të paragjykojnë dhe në fund asnjë s’do të ndihmojë – kështu është jeta! Në këto raste ndihmë kërkojmë vetëm nga specialistët dhe nga askush tjetër. Madje, një mënyrë e mirë për t’iu shmangur depresionit i cili vijon fill pas melankolisë dhe vetmisë është… “stërvitja” shpirtërore/psikologjike. Një libër i mirë gjithmonë të ndriçon, të udhëton aty ku ndoshta imagjinata jote ende s’të ka çuar. Në qoftë se periudha që përjetoni ndoshta nuk është më e lumtura e jetës suaj do t’ju rekomandoja të lexonit këtë libër fantastik të shkrimtarit të famshëm e të talentuar gjerman, Patrick Süskind.

PËLLUMBI – flet për një histori mjaft të thjeshtë, aspak emocionuese. Ka 90 faqe dhe mbulon vetëm një ditë, bën fjalë veç për një njeri, jeta e të cilit  tronditet nga shfaqja e një pëllumbi. Noel, kështu quhet personazhi i librit punonte 20 vjet si roje në një bankë. Jeta e vështirë fëminore por edhe ajo rinore e bënë që të mos donte asgjë tjetër përveç monotonisë dhe mungesës absolute të ngjarjeve. Pra, për 20 vjet me rradhë bënte jetë robote, punë – shtëpi dhe shtëpi – punë derisa një mëngjes veror, vjen pëllumbi… dhe i ndryshon jetën…

Miq, të njohur, të panjohur, çfarë do që t’ju ndodhë në jetë KURRË mos u dorëzoni, se gjithmonë ka një zgjidhje për gjithçka.

© AlbStroka.com