Ja disa mënyra për t’u bërë sa më të zgjuar

Nga Lorena Stroka

Teoritë që kemi dëgjuar për inteligjencën janë nga më të ndryshmet. Kjo, mund të vërehet fare lehtë, thjesht  duke klikuar në faqet e huaja që botojnë studime të ndryshme lidhur me shëndetin mendor. Kështu, pra në një klikim rradhe më tërhoqi vëmendjen një hulumtim lidhur me treguesin e inteligjencës, sipas të cilit  akoma edhe njerëzit që nuk kanë lindur me aftësi Einstein, me shumë vullnet dhe punë mund të arrijnë diçka. Edhe pse inteligjenca është e paracaktuar gjentikisht, ekzistojnë disa mënyra për të rritur funksionin e inteligjencës te çdokush.

Cilat janë ato mënyra?

1. Leximi i vazhdueshëm: Përpjekja për të mësuar vazhdimisht gjëra të reja, forcon trurin, sidomos kur njeriu është i bindur se mund t’ia dalë mbanë. Studime të ndryshme kanë treguar se sa më shumë që të lexojmë aq më tepër lidhje bëhen midis qelizave nervore të trurit, duke rritur kështu funksionin e inteligjencës. Sigurisht, që nuk duhet të harrojmë se akoma edhe në procesin e leximit nevojitet organizim.  Nuk mund të lexojmë artikuj pa vlerë, që shkruhen thjesht për numër,  dhe që nuk na ofrojnë asnjë njohuri.
2. Shmangia e stresit intensiv: Edhe pse stresi i paktë mund ta stimulojë njeriun që të mësojë sa më shumë, stresi i zgjatur dhe intensiv e bllokon trurin tërësisht.
3. Konsumi i çajit: Kafeina është stimuluese për organizmin dhe mpreh trurin.  Sipas të dhënave të disponueshme, preferoni kafeinën në çaj dhe jo atë në kafe.
4. Ushtrimi fizik: Ushtrimi i rregullt aerobik përmirson performancën në teste inteligjence tek të vegjëlit, ndërsa mbron edhe të rriturit nga dementia. Një studim i kohëve të fundit tregonte se njerëzit mbi 65 vjeç që ecnin 8 km në javë, me rritëm mesatar, rrezikonin 27% më pak që një ditë të zhvillonin dementia.
5. Zgjidhja e çdo gjëje të vështirë: Enigmave, fjalëkryqeve. Çdo test që kërkon përpjekje intensive mund të ndihmojë.

© 2010: Ndalohet ribotimi i shkrimit pa autorizimin e autores.