Zbuluan një gjen të ri që përgjegjësohet për kancerin

Nga Lorena Stroka

Shkencëtarët Britanikë gjatë realizimit të eksperimenteve laboratorike zbuluan një gjen që përgjegjësohet për përhapjen e qelizave kanceroze në trup. Hulumtuesit nga Universiteti i Anglisë Lindore (UEA), vlerësojnë se gjetja e tyre hap rrugën për hartimin e gjeneratës së re të medikamenteve antikanceroze, të cilat mund të jenë gati brenda një dekade.

Gjeni i quajtur WWP2 ndodhet brenda qelizave kanceroze. Ky gjen sulmon dhe ndan një proteinë të trupit, e cila normalisht pengon përhapjen e qelizave kanceroze.

Gjatë eksperimenteve në laborator, ekipi i UEA konstatoi se duke lidhur WWP2, rriten nivelet e proteinës specifike dhe qelizat kanceroze qëndrojnë në gjendje të heshtur (të paaktivizuara).

Sipas shpjegimit të studiuesit dr. Sarinter Sud, gjetja e re është një qasje e rëndësishme në trajtimin e kancerit dhe parandalimin e metastazave të tij.

Nga ana e tij, studiuesi dr. Andrew Chandra nga Departamenti i Shkencave Biologjike të UEA tha se “sfida tani është prodhimi i një medikamenti të fuqishëm, i cili do të arrijë në brendësi të qelizave kanceroze, për të eleminuar veprimin e gjenit WWP2.”

“Kjo është e vështirë, por jo e pamundur”, shtoi Dr. Chandra duke shpjeguar se dekadën e ardhshme mund të ketë medikamente të tjera që do të ndalojnë përhapjen agresive të shumë llojeve të kancerit si:

• kanceri i gjirit
• kanceri i trurit
• kanceri i zorrës së trashë
• kanceri i lëkurës

Tumoret kanë aftësinë të përhapen me largimin e qelizave nga tumori fillestar  dhe lëvizjen e tyre në trup nëpërmjet nyjeve limfatike ose gjakut. Kur arrijnë në destinacionin e tyre të fundit, fillojnë të shumëfishohen, duke krijuar tumore metastazike. Kanceri i gjirit, për shembull, përhapet përmes nyjeve limfatike duke shkaktuar tumore dytësore në eshtra dhe mushkëri.

© 2010: Ndalohet çdo ribotim i pa autorizuar.