Njeriu i sotëm do të KETË dhe jo të JETË

Nga Lorena Stroka

Shumë flasin për Art, por pak ia dinë rëndësinë…

Arti është veprimi i vetëdijshëm por dhe aftësia e veçantë e njeriut për të krijuar vepra që emocionojnë dhe zhvillojnë të menduarin. Përmes artit nuk shprehet vetëm ideali i bukurisë, sipas stilit të veçantë të artistit dhe kohës së tij, por dhe problemet shoqërore. Me pak fjalë, shumë herë arti shndërohet në pasqyrën e shoqërisë, ku njerëzit përballen me të vërtetat që i rrethojnë.

Arti kontribuon në kultivimin e gjithanshëm të njeriut (në gjykim, në perceptim, në zhvillim të imagjinatës etj). Zhvillon estetikën, pra, formon kriterin estetik, domethënë mundësinë për të vlerësuar siç duhet impulset artistike. Nxit ndjesinë e së bukurës, simetrisë dhe harmonisë. I mëson njeriut të vëzhgojë, të dëgjojë, të mirëkuptojë dhe të krijojë.

Arti nuk është vetëm kaq, gjithmonë ka ndikuar dhe vazhdon të ndikojë në jetën socio-politike. Arti nuk është vetëm mjet komunikmi apo përforcues i marrëdhënieve ndërpersonale, por pasqyron shembuj dhe sjellje, vlera socio-politike, si barazia, drejtësia, liria, paqja etj. Zgjon ndërgjegjen e qytetarëve dhe i sensibilizon për çështje të ndryshme shoqërore, jo në mënyrë imponuese por paqësore.

Jo më kot, arti është karakterizuar si “ilaç i shpirtit”. Angazhimi me të mund të ndihmojë në largimin e ankthit të përditshëm, tensioneve të brendshme por dhe zbulimin e mundshëm të një talenti të veçantë personal.

Arti është e vetmja gjuhë ndërkombëtare, vetëm ai mund të rrëzojë tabutë e të bëhet hallkë bashkuese e kulturave të ndryshme anembanë botës.

Pse njerëzit po i largohen artit të mirëfilltë?

Koha në të cilën po jetojmë është anti-intelektuale për shkak të orientimit të njëanshëm të njeriut bashkëkohor: njeriu i sotëm gjithnjë e më shumë po i jep përparësi anës materiale, fitimit të shpejtë e të lehtë, dhe më pak shkollimit.

    Për shkak të informimit të kufizuar kulturor, mungesës së mjediseve artistike për krijim, reklamimit të tepruar të veprave të dobta që nuk kanë asnjë lidhje me artin e vërtetë, si dhe pamundësisë ekonomike për të pasur vepra me vlera të larta artistike, shumë herë arti hijezohet, keqkuptohet, përçmohet dhe nëpërkëmbet.

Në mbyllje të këtij shkrimi do të doja që përtej “KEMI” t’i kushtojmë pak më shumë rëndësi asaj që quhet “JEMI” –  Mos harroni: Sipërfaqja është për të dobëtit, ndërsa Thellësia për të fortët!/AlbStroka.com/

© www.AlbStroka.com